ХУУЛЬ ЗҮЙН ҮНДЭСНИЙ ХҮРЭЭЛЭНГИЙН ХУУЛЬ ЗҮЙН СУДАЛГААНЫ ТӨВИЙН 2015 ОНЫ ЭХНИЙ ХАГАС ЖИЛД ГҮЙЦЭТГЭСЭН СУДАЛГААНЫ БҮТЭЭГДЭХҮҮН

ХУУЛЬ ЗҮЙН ҮНДЭСНИЙ ХҮРЭЭЛЭНГИЙН ХУУЛЬ ЗҮЙН СУДАЛГААНЫ ТӨВИЙН 2015 ОНЫ ЭХНИЙ ХАГАС ЖИЛД ГҮЙЦЭТГЭСЭН СУДАЛГААНЫ БҮТЭЭГДЭХҮҮН

Монгол Улсын Засгийн газрын 2012-2016 оны үйл ажиллагааны хөтөлбөр, Хууль зүйн яамны 2015 оны үйл ажиллагааны  төлөвлөгөө болон Хууль зүйн үндэсний хүрээлэнгийн 2015 оны үйл ажиллагааны төлөвлөгөө зэргийг үндэслэн, Хууль зүйн судалгааны төвийн ажиллах журмын 5.1-т заасныг удирдлага болгож ажилласны дүнд дараах тоон үзүүлэлт бүхий бүтээгдэхүүнийг 2015 оны эхний хагас жилд боловсруулж гаргасан байна. Үүнээс зарим ажлыг тоймловол:

Судалгаа, баримт бичгийн төсөл, санал зөвлөмж болон бусад бүтээгдэхүүн

• Бодлогын ба бусад судалгаа-6 бүтээгдэхүүн, үүнд “Монгол Улсын олон улсын гэрээг шүүхэд хэрэглэх асуудал”/2014-2015 он/,  “ Эрх зүйн бакалаврын зэрэг олгох сургалтын өнөөгийн нөхцөл байдлыг тодорхойлох нь”/2014-2015 он/, “Мэргэшсэн хуульч” бэлтгэх тогтолцоо-харьцуулсан судалгаа, Шүүхийн шинжилгээний тухай хуулийн шинэчилсэн найруулгын төсөлтэй холбогдсон судалгаа, “Гэмт хэргээс урьдчилан сэргийлэх ажил, хууль эрх зүйн зохицуулалт”, “Эрүүгийн байцаан шийтгэх ажиллагааны үе шат” сэдэвт  судалгааны ажил багтаж байна.
• Баримт бичгийн төсөл, санал, зөвлөмж-11 бүтээгдэхүүн, тухайлбал НҮБ-ын Хүний эрхийн зөвлөлийн Ээлжит нэгдсэн хэлэлцүүлгийн ажлын хэсгийн 22 дугаар чуулганаар 2015 оны 5 дугаар сарын 5-наас 8-ны өдрүүдэд Женев хотноо хэлэлцэгдсэн Монгол Улс дахь хүний эрхийн төлөв байдлын талаарх үндэсний хоёрдугаар илтгэл/UPR/-ийн төсөл боловсруулах ажилд оролцсон байна.
• Ном, гарын авлага, бусад хэвлэл -5 бүтээгдэхүүн, тухайлбал, “Хууль дээдлэх ёс” сэтгүүлийн 2015 оны 1, 2 дугаарыг цаг тухайд нь эрхлэн гаргав; “Хууль зүйн англи хэлний орчуулгын гарын авлага - эрх зүйн баримт бичиг, худалдааны гэрээ” сэдэвт сурах бичиг боловсруулан гаргаж сургалтын эх сурвалж болгосон; Монгол Улсын хууль тогтоомжийн эмхэтгэл-IV боть /хятад хэл дээр/ номыг “Ард” өмгөөлөгчийн товчоо, Өмгөөллийн “Яашинсүлд” ХХН-тай хамтран хэвлүүлэв.
• Илтгэл, эрдэм шинжилгээний өгүүлэл, нийтлэл-10 бүтээгдэхүүн, тухайлбал, Бодлогын ахлах судлаач Б.Энх-Амгалан “БНХАУ дахь Их засаг судлалын төлөв”, Бодлогын судлаач Б.Одонгэрэл “Гэмт хэрэгтнийг нийгэмшүүлэх асуудал”, Бодлогын судлаач Б.Гончигсумлаа “Төрөөс улсын тусгай хэрэгцээг үндэслэн иргэний эзэмшил, өмчлөлийн газрыг нөхөх олговортойгоор солих болон эргүүлэн авах, түүний эрх зүйн зохицуулалт”, Бодлогын судлаач С.Бүжинлхам “Шүүхээс гадуурх гэмт этгээд, хохирогч хоорондын зөвшилцөл”, Бодлогын судлаач Э.Туулайхүү “Олон улсын байгууллагын эрх зүйн байдал, хүлээх хариуцлага / Олон улсын ба үндэсний эрх зүйн жишээн дээр/” сэдвээр эрдэм шинжилгээний өгүүлэл, илтгэл, нийтлэл тус тус бэлтгэж “Хууль дээдлэх ёс” болон бусад сэтгүүл, эмхэтгэлд хэвлүүлсэн байна.   
• Эрдэм шинжилгээний хурал, хэлэлцүүлэг, лекц-16 бүтээгдэхүүн, тухайлбал, 2015 оны 5 дугаар сарын 8-ны өдөр Үндсэн хуулийн цэц, ХЗҮХ, Их Засаг олон улсын их сургууль хамтран “Их засгийн эхийг эрэн сурвалжлах нь” сэдвээр олон улсын эрдэм шинжилгээний бага хурал, 2015 оны 5 дугаар сарын 27-ны өдөр  ХЗҮХ, ҮТА, МУИС-ийн ХЗС, МУИС-ийн ОУХНУС хамтран “Монгол Улсын үндэсний аюулгүй байдал ба олон улсын гэрээ” сэдэвт эрдэм шинжилгээний бага хурлыг амжилттай зохион байгууллаа.
• Сургалт, семинар-5 бүтээгдэхүүн, тухайлбал, ХЗҮХ-ээс зохион байгуулж байгаа Хууль зүйн англи хэлний орчуулгын сургалтад Бодлогын судлаач Э.Туулайхүү 05 дугаар сарын 14, 15-ны өдрүүд, 06 дугаар сарын 02, 03-ны өдрүүдэд “Бизнесийн маргаан шийдвэрлэх тогтолцоо, Олон улсын хөрөнгө оруулалтын эрх зүй”  сэдвээр, 2015 оны 6 дугаар сарын 18-ны өдөр ХЗҮХ-ээс Хөвсгөл аймгийн Мөрөн хотод зохион байгуулсан эрх зүйн албан бус сургалтад  Бодлогын ахлах судлаач Б.Энх-Амгалан “Монгол Улсын олон улсын гэрээний хэрэгжилт: Хүний эрх” сэдвээр сургалт тус тус хийв.
• Номын сангийн үйл ажиллагаа-танхимын болон цахим бүтээгдэхүүн, үйлчилгээ, үүнд ном, гарын авлага уншлагын танхим, гэрээр олгох, уншигчийн эрх шинээр нээх, сунгалт хийх, шинэ номын мэдээ гаргах, мэдээллийн самбарт байрлуулах, шинэ номын үзэсгэлэн гаргах, эх сурвалж, лавлагаа гаргах зэрэг өдөр тутмын үйл ажиллагаанаас гадна уншигч, зохиогч, номын сангийн эргэх холбоог сайжруулах зорилгоор "social media" -г ашиглан уншигч, судлаачдыг шинэ номын мэдээлэл, номын сангийн зарим үйлчилгээгээр хангах болон номын сангийн фондыг баяжуулах чиглэлээр анхаарч ажилласан. Номын сангийн фонт монгол хэл дээр 12000, гадаад хэл дээр 1000 орчим ном, сэтгүүлтэй боллоо.  2015 оны 6 дугаар сарын 29-ний өдрийн байдлаар номын сангийн facebook хуудас 11767 дагагчтай, 7 хоног бүр дагагчдын тоо 45 орчмоор нэмэгдсэн байдлаар тогтмол хандалттай байна.   Номын сангийн twitter хуудас /https://twitter.com/library_HZUH/-ын  дагагчдын тоо 1048-д  хүрээд байна.
• Бусад ажил-24. Энэ ангилалд гадаад харилцаа, хамтын ажиллагааг хөгжүүлэх, орчуулгын ажил гүйцэтгэх, ажлын хэсэгт томилогдож ажиллах, хуулийн төсөл боловсруулах ажлын хэрэгцээнд  дэмжлэг үзүүлэх, санал, зөвлөмж гаргах, хөтөлбөр, төлөвлөгөө боловсруулах, мэдээлэл, сурталчилгаа, сургалтын ажилд эх сурвалж бэлтгэх, оролцох болон хурал, хэлэлцүүлэг, хамтын ажиллагаа зохион байгуулах зэрэг бусад ажил, үйлчилгээ  багтаж байна.

ХУУЛЬ ЗҮЙН СУДАЛГААНЫ ТӨВ